Elektr toki bilan ta’sir etib…

Har qanday kasallikning oldi olinmasa, kerakli dav choralari ko‘rilmasa, u organizmni yemirishi, oxir-oqibat kech bo‘lishi hech gap emas. Miya saratoni esa eshitgan odamni sergaklantirib, kerakli muolajaalarni qo‘llash lozimligi haqida xavf qo‘ng‘irog‘ini chalganday bo‘ladi. Bu kasallik odatda juda tez kuchayib, o‘z vaqtida davolanmasa, sog‘lom nerv hujayralariga hujum qiladi va kognitiv funksiyani buzadi. Oqibatda bora-bora bemorga dori-darmonlar ta’sir qilmay qo‘yadi.
Buyuk Britaniyaning Kembrij universiteti va Irlandiyaning Triniti biotibbiyot fanlari instituti olimlari xuddi shu xavfli o‘smalarga qarshi samarali kurashish usulini topdi. Tadqiqot donorlardan olingan glioblastoma to‘qimalari namunalarida o‘tkazildi. Ma’lum bo‘lishicha, elektr toki orqali organizmdagi NK-hujayralar (tabiiy qotil hujayralar)ning miyadagi saraton o‘simtalarini yo‘q qilish “qobiliyat”ini oshirish mumkin. Buni tasdiqlash uchun laboratoriya sharoitida “tabiiy qotil hujayralar”ga elektr maydonini hosil qiluvchi qurilma yordamida ta’sir ko‘rsatildi va kutilgan natijaga erishildi.
Aytish joizki, NK-hujayralar tug‘ma immunitetning ishlashida ishtirok etadigan limfotsitlardir. Olimlarning ta’kidlashicha, NK-hujayra terapiyasi ko‘pincha saratonning og‘ir turlarini muolaja qilishda qo‘llaniladi. Tadqiqotchilar xulosasiga ko‘ra, elektr maydoni orqali davolash, immunoterapiya va onkologik kasalliklarga qarshi kurashishning boshqa usullari kombinatsiyasi glioblastoma bilan og‘rigan bemorlarning sog‘ayish imkoniyatini sezilarli darajada oshirishi mumkin.