Tashabbus ko‘plarni ergashtira olsa, yoshlarni ezgulikka, ijodga chorlashi, mahorat va iqtidorlarni yuzaga chiqarsagina, u to‘g‘ri yo‘lga boshlagan bo‘ladi. Termiz davlat universiteti yoshlar ittifoqi boshlangʻich tashkiloti tashabbusi ham ana shunday ahamiyatga ega bo‘ldi. Ayni tashabbus bilan talabalar oʻrtasida “Milliy qadriyatlar yoshlar nigohida” mavzusida rasmlar tanlovi oʻtkazildi.
Rassomchilikda iqtidori va iste’dodi bor yoshlar ishtirok etgan tanlov tabiat qo‘ynida, ochiq havoda o‘tkazildi. Bunday sharoitda ilhomning, zavq-u shavqning o‘zi kelishi rost ekan. Sababi, yosh rassomlar qo‘llariga qalam tutib oq qog‘oz qarshisida zumda ijodga sho‘ng‘idilar. Ular asosan portret janrida ijod qilib, milliy obrazlarni yaratishdi. Chizgilar va ranglar uygʻunlik kasb etgan suratlarda milliy ruh, o‘zbek qiyofalari ko‘rinish berdi.
Tanlov natijalariga koʻra, Sarvinoz Boltayeva va Moxichehra Abdurahmonova (Rangtasvir yoʻnalishi 4-kurs)lar 1-o‘ringa munosib ko‘rildi. Gʻoliblar diplom va esdalik sovgʻalari bilan taqdirlandi.
