Hunardan unar…

Hunar, hunardan unar degan gapda jon bor ekan. Qo‘lingizda hunaringiz bo‘lsa, yo‘qni yo‘ndirib, nimadir yasaysiz-da, bir-ikki so‘mlik bo‘lasiz. Hunaringizni rivojlantirsangiz, bu ishingiz sizni boy qilishi aniq. Sho‘rchilik Murod Panjiyev ham qo‘li gul hunarmandlardan. U o‘tgan yili “Yoshlar daftari”ga kiritilib, hunarmandchilik qilish maqsadida 33 million so‘m imtiyozli kredit olib, o‘z ishini boshladi. 5 nafar mahalladoshini yoniga olib, kasbini o‘rgatdi, qo‘li kelishib, yordam berib boshlagach esa bandligini ta’minladi. Qarabsizki, qisqa muddatda oltovlon zamonaviy mebel ishlab chiqarishni yo‘lga qo‘yishdi.
O‘zlarida mebel ishlab chiqarilayotganini ko‘rgan-bilganlar, eshitganlar esa u yoki bu mebelni buyurtma bera boshladi. Sifatli, hamyonbop va zumda buyurtmangizni tayyorlab beradigan hunarmandlarning ishi xalqqa manzur bo‘lib, kelib-ketguvchilarning, buyurtma beruvchilarning soni oshib bormoqda. Albatta, halol va sidqidildan qilingan mehnat yerda qolmas ekan. Bunga yosh hunarmandlarning faoliyati misolida ko‘rib, amin bo‘lish mumkin.