Sirdaryodagi “Sardoba” suv ombori fojiasini eslasak, tanamiz jimirlab, ko‘zimizga yosh keladi. Qanchadan-qancha insonlar boshpanasiz, yosh bolalari bilan ko‘chada qoldi. Albatta, davlatimiz tomonidan ularga kerakli yordam ko‘rsatildi. Ammo, bu ofat xalqni bir bor sinovdan o‘tkazdi. Bundan tegishli xulosa chiqargan xalqimiz, davlatimiz sergaklandi. Ana shunday hodisalarning oldini olish maqsadida Prezidentimiz qaroriga asosan, O‘zbekistondagi barcha suv ommborlari zamonaviy uskunalar bilan jihozlanib, ya’ni (lokal xabar berish) uskunalari o‘rnatila boshlandi. Aytish kerakki, ushbu aqlli suv o‘lchagichlar suv chiqish qurilmalarini avtomatlashtirib, tizim bevosita MChSning yagona kuzatuvida bo‘ladi. Natijada, har qanday ko‘ngilsizlik va ofatlarning oldi olinib, xalq osoyishtaligi ta’minlanadi.
O‘zbekiston Respublikasi Vazirlar Mahkamasining 2017-yil 8-avgustdagi 601-sonli qarorining ijrosini ta’minlash maqsadida Termiz tumanidagi «Uchqizil» suv omborini rekonstruksiya qilish obyektining loyiha-smeta hujjatlarini ishlab chiqish jarayonida favqulotda vaziyatlar xavfi yoki sodir bo‘lganligi haqida aholiga xabar berish uchun (LORA) uskunalarini o‘rnatish va avtomatlashtirish ishlari amalga oshirildi. Loyiha doirasida 1720 metr to‘g‘on, ya’ni damba ustini asfaltlash ishlari “Milliy qurilish ta’mirlash” MCHJ korxonasi tomonidan amalga oshirildi.
Dinara Quzimurotova
