G‘alla-2024: mavsum uyushqoqlik bilan boshlandi

O‘z vaqtida boshlangan ish unumli va barokatli bo‘ladi. Shu sababdan ham Surxondaryo viloyati hokimi Ulug‘bek Qosimov vohaning 5 ta hududiga tashrif buyurib, 2024-yil hosili uchun g‘alla ekish ishlarini tizimli va sifatli amalga oshirishga bag‘ishlangan seminarlarda ishtirok etdi va barchani mavsumni uyushqoqlik bilan boshlashga chaqirdi.
Seminarda Jarqo‘rg‘on, Qumqo‘rg‘on, Sho‘rchi, Oltinsoy va Denov tumanlarida kuzgi boshog‘li don ekish ishlarini boshlash bilan birga qisqa muddatlarda sifatli yakunlash haqida so‘z bordi. Qolaversa, sug‘orish va to‘liq ko‘chat olish masalalari muhokama qilinib, mas’ullarga aniq vazifalar belgilab berildi.
Har bir tumanda “Shudgor-2023” shtabi tashkil qilinadigan bo‘ldi. Texnikalarni shay holatga keltirib, shudgorlash ishlarini fosforli va kaliyli o‘g‘itlar bilan olib borish hamda yerni sifatli haydalishini ta’minlash bo‘yicha sektor rahbarlari, soha mas’ullariga aniq muddatlar bilan vazifalar topshirildi. Shuningdek, shudgorlash ishlari uchun tashkil etilgan otryadlarga oziq-ovqat mahsulotlari tarqatildi.