Endi rahbarlarga xalq baho qo‘yadi

4-5 ta xodimni boshqarish uchun ham rahbarda iqtidor, layoqat va mas’uliyat kerak. Har qanday boshqaruv, ish samaradorligi ortida ko‘pning manfaati, xalqqa va vatanga xizmat yotishi kerak. Xo‘sh, bugun ana shunday hislat va jihatlar mujassam rahbarlarni taniymizmi? Qaniydi hamma ham o‘z vazifasini vijdonan va xolis bajarsa… rahbarlar xalq ichidan chiqib, xalq dardi-yu tashvishi bilan yashasa…
Talab qanchalik yuqori bo‘lsa, mas’uliyat ham shunga yarasha bo‘ladi. Ana shunday lavozimlarga munosib nomzodlar tayinansa yoki saylansa, maqsadga buvofiq bo‘larmidi. Ayni jihatlar inobatga olingan holda endi O‘zbekistonda davlat organlari rahbarlari faoliyatini jamoatchilik fikri asosida baholash yo‘lga qo‘yiladi.
Bu haqda «O‘zbekiston — 2030» strategiyasi to‘g‘risidagi prezident farmonida belgilandi. Farmonga ko‘ra, davlat organlari rahbarlari va ularning o‘rinbosarlari faoliyatini jamoatchilik fikri asosida baholash amaliyoti yo‘lga qo‘yiladi. Bu esa tizimda, faoliyatda shaffoflik va adolatni ta’minlab bersa, ajab emas.