Ochiq eshiklar kunida

Vatanga muhabbatni tasvirlashga shoir qalami ojizlik qilganidek, bu tuyg‘uni so‘z bilan ifoda etib bo‘lmaydi. Uning xizmatiga otlangan o‘g‘lonlar esa ana shu muhabbat kuchi ila shasht va ishtiyoqqa to‘ladi. Bu yo‘lda shirin jonlarini-da tikib, muqaddas burchni ado etishga kirishadi. Bu yil esa ona vatanimiz mustaqilikka erishganiga 32 yil to‘layotir. Sanoqli kunlardan so‘ng yurtimiz bo‘ylab bayram shodiyonalari boshlanadi.
Ana shunday tantanalarning uchquni Termiz shahridagi harbiy qismda ham alanga oldi. O‘zbekiston Respublikasi Davlat mustaqilligining 32 yilligi arafasida harbiy qism harbiy xizmatchilari tomonidan “Vatan muqaddas, uni himoya qilish sharafli burch!” shiori ostida “Ochiq eshiklar kuni” tashkil etildi.
Tadbirga tashrif buyurganlarda taassurotlar esda qolarli bo‘lishi uchun harbiy qism tomonidan o‘q otish sport musobaqasi ham o‘tkazildi. O‘zbekiston Respublikasi Mudofaasiga ko‘maklashuvchi “Vatanparvar” tashkiloti Surxondaryo viloyati kengashi xodimlari bilan hamkorlikda tashkil etilgan tadbirda harbiy xizmatchilarning farzandlari va viloyat Mudofaa Ishlari huzuridagi Chaqiriluvchilarni harbiy texnika mutaxassisliklari bo‘yicha tayyorlash markazi chaqiruvchilari ishtirok etdi.
Ayniqsa, o‘q otish sport musobaqasi qiziqarli bo‘ldi. Ishtirokchilar o‘zlarining merganliklarini sinab ko‘rish maqsadida raqobatlashdilar. Qizg‘in kechgan raqobatlashuvni kuzatib turgan tomoshabin bolalar ko‘nglida ham aynan harbiylikka, o‘q otishga qiziqish uyg‘ongan bo‘lsa, ajab emas.