Termiz shahri “Tinchlik” mahallasida loyiha qiymati 21 milliard so‘m bo‘lgan Bilim va malakalarni baholash agentligining Surxondaryo viloyati filiali uchun qurilayotganidan xabarimiz bor. 1 000 o‘rinli yangi bino qurilish jadallik bilan davom etayotir. Surxondaryo viloyati hokimi Ulug‘bek Qosimov ayni kunlarda Surxondaryoda bo‘lib turgan O‘zbekiston Respublikasi Oliy ta’lim, fan va innovatsiyalar vaziri Ibrohim Abdurahmonov bilan ushbu loyiha binosining qurilish jarayonlari bilan tanishdilar.
Ayni mahalla hududida 3 gektar maydonda tashkil etilishi rejalashtirilayotgan Yoshlar sanoati va tadbirkorlik zonasi qurilishiga ham start berildi. Zona tashkil etilayotgan maydon 14 ta lotga bo‘lingan va hozirda ushbu lotlar auksion savdolariga chiqarilgan. Yoshlar sanoati va tadbirkorlik zonasida umumiy qiymati 63,1 milliard so‘mlik, ishlab chiqarish quvvati 54,2 milliard so‘mlik loyihalar amalga oshiriladi. Loyiha ishga tushishi bilan esa 140 ta yangi ish o‘rni yaratish belgilangan.
