Ulug‘bek Tillayev o‘z kelajagini IT sohasida ko‘radi. Kompyuterda ishlashni yoqtiradi. Robotexnikaga qiziqadi. Maktabdagi darslarni ham tashlab qo‘ymay, barini birdek olib borishga intiladi. Sababi, IT sohasida ishlash uchun barcha fanlarni bilishi lozimligini u yaxshi biladi. Ammo, ko‘zida nuqsoni borligi, ko‘rishi yil sayin yomonlashib borayotgani Ulug‘bekni tushkunlikka tushurib qo‘ygani ham haqiqat.
Ana shunday paytda Respublika ishchi guruhi Surxondaryo viloyatiga tashrifi chog‘ida Muzrabot tumanida ham bo‘lib, og‘ir toifadagi yoshlar bilan uchrashuvlar tashkil etildi. Bu bilan kifoyalanmay, uyma-uy yurib, aholining, xususan, yoshlarning yashash sharoitlari o‘rganildi. Ana shunday o‘rganish va uchrashuv davomida Ulug‘bek Tillayev ishchi guruhning e’tiborini tortdi.
Ulug‘bekning murojaati inobatga olinib, u Toshkent shahrida joylashgan Ko‘z mikroxirurgiyasi markazida tibbiy ko‘rikdan o‘tdi. Bundan tashqari O‘zbekiston Respublikasi Oliy ta’lim, fan va innovatsiyalar vazirligida o‘zi qiziqqan robototexnika mashg‘uloti bilan shug‘ullanayotgan yoshlar bilan yaqindan tanishdi.
Qisqa fursatlarda Ulug‘bekning ko‘zlari shifo topadi va u o‘z orzulari izidan harakat qilishni boshlaydi. O‘ziga bo‘lgan ishonchni qaytarib, unga kuch va shijoat bag‘ishlagan mas’ullardan mamnun.
S.Davlatova
