Jarqo‘rg‘on tumanidan ko‘plab sport ustalari, yurt bayrog‘ini jahon arenalarida hilpiratayotgan sportchi yoshlar yetishib chiqayotgani ko‘ngilni quvontiradi. Xoh futbol, xoh kurash bo‘lsin yoinki boksda bo‘lsin jarqo‘rg‘onliklar peshqadamlar safidan o‘rin olib kelmoqda.
Bu gal jarqo‘rg‘onlik Diyorbek boksda mamlakatimiz bayrog‘ini yuksaklarga ko‘tardi. Olis qishloqning, chekka joyida yashab istiqomat qilib, bugun dunyo tan berayotgan sportchilarning shu darajaga yetishida qanday siru sinoat borligiga qiziqishi turgan gap.
Ammo sportda sir emas, chinakamiga intilish va mehnat borligini sport ixlosmandlarini qoyil qoldirarlik jang namoyish eta olgan vohadoshimiz isbotlab qo‘ydi. U ustoz-murabbiylariga so‘zsiz itoatda bo‘lgani, oldiga maqsad qo‘yib, intilgani bugun o‘z so‘zini aytdi.
Sportning boks turi bo‘yicha 5-9-aprel kunlari Ruminiyada o‘tkazilgan “Golden Belt” xalqaro turniri o‘z nihoyasiga yetdi. Jahonning 13 mamlakatidan bokschilar ishtirok etgan musobaqada O‘zbekiston terma jamoasi 6 ta oltin, 4 ta kumush va 3 ta bronza medalini qo‘lga kiritib, umumjamoa hisobida birinchi bo‘ldi.
Quvonarlisi, shundaki ushbu turnirda Jarqo‘rg‘on tuman Bolalar-o‘smirlar sport maktabida boks bilan muntazam shug‘ullanib kelayotgan Diyorbek O‘ralov 92 kg vazn toifasida ishtirok etib 2-o‘rinni egalladi va terma jamoamiz hisobiga kumush medalni yozdirib qo‘ydi.
E.Elmurodova
