Avtobusda ketayotib, ba’zan haydovchi qandaydir guvohnomasini ko‘rsatib, yo‘l haqini to‘lamay tushib ketayotgan yo‘lovchilar izidan hay-haylagancha jig‘ibiyron bo‘lganining guvohi bo‘lamiz. To‘g‘ri-da, belgilangan tartibga rioya qilish lozim. Axir, uzog‘imizni yaqin qilayotgan avtoulovlar tekinga yurmaydi, haydovchi esa havasga xizmat ko‘rsatmaydi.
Ammo, avtobuslardan bepul foydalanish huquqiga ega yo‘lovchilar ham yo‘q emas. “Shahar yo‘lovchilar transportidan bepul foydalanishni tartibga solish to‘g‘risida”gi O‘zbekiston Respublikasining qonunida shahar yo‘lovchilar transportidan (taksidan tashqari) urush qatnashchilari, front ortida fidokorona mehnat qilgani uchun taqdirlangan hamda Afg‘oniston Respublikasida va boshqa mamlakatlarning hududidagi jangovar harakatlarda qatnashgan sobiq baynalminalchi jangchilardan tashqari ko‘zi ojiz nogironlar va ko‘zi ojiz nogironga hamrohlik qiluvchi shaxslar ham bepul foydalanish huquqiga ega.
S.Allayeva,
jurnalist
