Muzrabot tumanining “Anorzor” mahallasi ahli o‘zlarining fuqarolik burchlarini bajarib, yer va mol-mulk soliqlarini o‘z vaqtida to‘lashadi. Shuning uchun ham ushbu mahalla soliq qarzdorligidan holi hududga aylangan. Har ishi bilan jamiyatga ibrat va namuna bo‘lgulik “Anorzor”ga Surxondaryo viloyati hokimi Ulug‘bek Qosimov tashrif buyurdi va mahalla nuroniylari va faollar bilan uchrashdi. Aytish lozimki, mahalladagi har bir ish tizimli va namunali tashkil etilgan.
Fuqarolarning soliq madaniyatiga rioya etayotganligi esa tahsinga sazovor. Ayni shu sababdan ham mahallaning ichki yo‘llari asfaltlab beriladigan bo‘ldi. Yaxshi amallarning mukofoti bu bilan kifoyalanmadi, balki mahalladagi ishsiz 15 nafar xotin-qiz va 6 nafar alohida toifadagi yoshga o‘zini-o‘zi band qilishlari uchun subsidiya asosida tikuvchilik dastgohi, asbob-uskuna va jihozlar topshirildi.
