Elektr aviatsiyasi rivojida navbatdagi muhim qadam tashlandi. AQSHning Heart Aerospace kompaniyasi tomonidan ishlab chiqilgan X1 elektr samolyoti Nyu-York shtatidagi Plattsburg aeroportida ilk sinov parvozini muvaffaqiyatli amalga oshirdi.
Sinov davomida samolyot 335 metr balandlikka ko‘tarilib, 27 daqiqa havoda bo‘ldi. Parvoz faqat akkumulyatorlar quvvati hisobiga amalga oshirilgan va kompaniya hisob-kitobiga ko‘ra, atigi 5 dollarlik elektr energiyasi sarflangan.
Uzunligi 32,3 metr, qanotlari 23,2 metr bo‘lgan X1 samolyotining parvoz og‘irligi 11,3 tonnani tashkil etadi. Uning elektr motorlari 1 megavattdan ortiq quvvatga ega.
X1 loyihasi elektr dvigatelli samolyotlarning imkoniyatlarini amalda namoyish etish hamda kelajakda ekologik toza aviatsiya texnologiyalarini rivojlantirish yo‘lidagi muhim tajribalardan biri hisoblanadi.
