Qarov yaxshi bo‘lsa…

Dalalarga allaqachon g‘alla ekilib, ekinlar ko‘kka bo‘y cho‘zgan. Kerakli agrotexnik tadbirlar o‘z vaqtida bajarilib, qarov joyida bo‘lsa, mo‘l hosil olishimiz aniq. Viloyat hokimi Ulug‘bek Qosimov Angor, Muzrabot, Sherobod, Qiziriq va Jarqo‘rg‘on tumanlariga tashrif buyurib, klaster va fermer xo‘jaliklari dalalarida olib borilayotgan agrotexnik tadbirlar bilan tanishdi. Xususan, qo‘shqator va an’anaviy usulda ekilgan g‘o‘zaga ishlov berish, kultivatsiya, zararkunandalarga qarshi kurashish, g‘alla maydonlarini mineral o‘g‘itlar bilan oziqlantirish jarayonlari ko‘zdan kechirildi.
Shuningdek, hududlarda dala chetlaridan samarali foydalanish borasidagi vazifalar ijrosi o‘rganilib, oziq-ovqat mahsulotlari ekilishi bilan ham tanishildi. Tashrif davomida fermerlar bilan muloqot o‘tkazilib, paxta, g‘alla, pilla va oziq-ovqat mahsulotlari yetishtirish borasidagi dolzarb masalalar muhokama qilindi. Ishlarning samaradorligini oshirish, ilg‘or tajribalarni ommalashtirish bo‘yicha mutasaddilarga aniq vazifalar belgilab berildi.