Bola bejizga niholga mengzalmaydi. Uning tarbiyasi ham qarov kabidir. E’tiborsizlik, o‘z holiga tashlab qo‘yish har ikki holatda ham halokatga, yo‘qotishga olib keladi. Farzandlarimizning hayotiga, taqdiriga e’tiborsizlikni esa kechirib bo‘lmaydi. Xolbuki, Termiz shahridagi umumtaʼlim maktablarining jinoyat sodir etgan, profilaktik hisobda turgan va huquqbuzarlik sodir etishga moyilligi yuqori boʻlgan 150 nafar voyaga yetmagan oʻquvchining ro‘yxati mavjud. Hechdan ko‘ra kech deganlaridek, ana shu yoshlar uchun alohida dastur asosida joylarda tadbirlar oʻtkazilib kelinmoqda.
Ushbu tadbirda sektor rahbarlari, tegishli tashkilotlar rahbarlari va masʼullari, harbiylar, umumtaʼlim maktablarining maʼnaviyat boʻyicha oʻrinbosarlari va psixologlari hamda keng jamoatchilik faollari bilan birgalikda OAV vakillari ham ishtirok etishdi. Uchrashuv voyaga yetmagan o‘quvchilarni ilm olishga va kasb-hunar o‘rganishga qiziqtirish maqsadida tashkil etilgan emasmi, shu sababdan ham dastur ishi birinchi galda Termiz shahridagi “Yoshlar markazi” binosidagi to‘garaklar faoliyat jarayonlarini tanishtirish bilan boshlandi.
Yoshlarda g‘oyaviy va axborot xurujlariga qarshi mafkuraviy immunitetni kuchaytirish, faol fuqarolik pozitsiyasini, fidoyilik va vatanparvarlik tuyg‘usini kamol toptirish maqsadida harbiy qism hamda “Yosh chegarachilar” harbiy-akademik litseyi faoliyati bilan tanishuv uyushtirildi. Shuningdek, “Qoʻgʻirchoq” teatrida o‘quvchilar va ularning ota-onalari uchun mehnat yarmarkasi tashkil etilgan bo‘lsa, yoshlarni chuqurlashtirilgan tibbiy ko‘rikdan o‘tkazilgani ham g‘amxo‘rlikning amaldagi ifodasi bo‘ldi.
Jarayon “Sektor rahbarlari va voyaga yetmaganlar” uchrashuvi bilan davom etdi. Termiz shahar hokimi O‘.To‘rayev, shahar prokurori X.Mamatqulov, Termiz muxandislik-texnologiya instituti prorektori M.Majidov, shahar bosh imomi R.Abdullayevlar yoshlar bilan muloqot olib bordi. Uchrashuvda “Tengdoshga-tengdosh” maylida muvaffaqiyatga erishgan yoshlarning so‘zga chiqqani 150 nafar qora ko‘zga munosib motivatsiya bergan bo‘lsa ajab emas.
Tadbirlarlar yakunida musiqiy dastur va spektakl namoyishi qo‘yilib, yoshlarga yanada ko‘tarinki ruh bag‘ishladi.
