BMT Bosh Assambleyasining 2011-yil 19-dekabrdagi rezolyuttsiyasiga asosan, 11-oktyabr sanasi “Xalqaro qizlar kuni” deb e’lon qilingan. Aytish kerakki, ushbu kun munosabati bilan joylarda tadbirlar, kechalar, uchrashuvlar tashkil etilib, sana munosib nishonlandi. Sherobod tumani madaniyat markazida «Qizlar millat tayanchi» shiori ostida «Sening tashabbusing – Sening kelajaging uchun» qizlar forumi o‘tkazildi.
Forum maktablarda ta’lim olayotgan ziyrak, iqtidorli va iste’dodli qizlarning qo‘l mehnati yordamida yasagan buyumlari ko‘rgazmasi bilan boshlandi. Tashrif buyurgan borki, ko‘rgazmaga qo‘yilgan qo‘l mehnati namunalaridan zavq olishdi.
Ko‘tarinki ruhda boshlangan tadbir bilimli, iqtidorli va faol qizlarning yutuqlari bilan tanishtirish bilan boshlandi. Ularning izlanish va harakatlari e’tirof etilib, tashakkurnoma va esdalik sovg‘alari bilan taqdirlangani esa bayramga o‘zgacha fayz va ruh kiritdi.
Muhimi tashkil etilgan forum bahona qizlar munosib qo‘llab-quvvatlandi, e’tirof va rag‘bat topdilar. Vaqtlarini mazmunli o‘tkazib, 11-oktyabr sanasini yaxshi xotiralar bilan eslaydigan bo‘lishdi.
