“Chempion bolam…” — bu so‘zlarni Mukarram ona o‘g‘li Rajabboyni bolaligida mehr bilan erkalab aytardi. O‘sha paytda bu oddiy onalik mehri, ezgu tilagi edi. Ammo yillar o‘tib, bu so‘zlar Rajabboy boboning butun hayot yo‘liga o‘zgacha mazmun kasb etdi. U o‘zi chempion bo‘lishdan ko‘ra, chempionlar yetishtirgan ustoz sifatida el xotirasida qoldi.
Rajabboy bobo 1951-yilda Mammadmurod ota va Mukarram ona oilasida dunyoga kelgan. Bolaligidan ziyrak, harakatchan va intiluvchan bo‘lib ulg‘aydi. Sheroboddagi maktab yillarida sportga qiziqishi tobora kuchaydi. Jismoniy chiniqish, qat’iyat va g‘alabaga intilish unda shunchaki qiziqish emas, kelajak kasbining asosiga aylana boshladi.
Maktabni tamomlagach, Termiz shahridagi jismoniy tarbiya oliygohida tahsil oldi. Bu yerda sport sirlarini chuqur o‘rgandi. Oliy ta’limdan so‘ng ikki yil Germaniyada harbiy xizmatni o‘tashi esa undagi intizom, sabr-toqat, mas’uliyat va jamoa bilan ishlash ko‘nikmalarini yanada mustahkamladi.
Yurtga qaytgach, Rajabboy bobo Sherobod tumanidagi 1-sonli maktabda o‘qituvchi bo‘lib ish boshladi. Shu kundan boshlab uning hayotida sport va ustozlik bir-biridan ajralmas tushunchaga aylandi. U yoshlarni nafaqat jismonan chiniqtirish, balki ularni iroda, intizom va maqsad sari intilish ruhida tarbiyalashni o‘zining asosiy vazifasi deb bildi.
Yosh alpinistlardan boshlangan katta yo‘l
1974-yil Rajabboy boboning murabbiylik faoliyatida alohida burilish yasadi. U “Yosh alpinistlar” guruhini tuzdi.
Bu oddiy to‘garak emas edi. Yoshlarni tog‘ sharoitiga tayyorlash, jismoniy chiniqtirish, mashaqqatga bardosh berishga o‘rgatish, eng muhimi, qo‘rquvni yengishga undash murabbiydan katta bilim va jasorat talab qilardi.
Rajabboy bobo boshchiligidagi yoshlar “Ayri bobo” cho‘qqisini zabt etib, u yerga davlat bayrog‘ini o‘rnatdilar. Guruhning “Yosh alpinistlar” unvoniga sazovor bo‘lishi esa bu mehnatning ilk katta natijalaridan biri bo‘ldi.
Ammo Rajabboy bobo uchun bu g‘alaba manzil emas, yangi yo‘lning boshlanishi edi. Uning shogirdlari keyingi yillarda turli musobaqalarda qatnashib, yuqori natijalarga erisha boshladilar. Chunki u sportni medal yoki musobaqa bilangina o‘lchamasdi. Uning nazarida sport — yosh inson xarakterini tarbiyalaydigan maktab edi.
Sport maydonida chiniqqan bola hayotning boshqa sinovlariga ham bardoshli bo‘ladi, deb hisoblardi u.
Shuhrat nomidagi ota duosi
1974-yilda Rajabboy bobo va Yulduz buvining oilasida o‘g‘il farzand tug‘ildi. Unga Shuhrat deb ism qo‘yildi.
Bu ismning ortida ham ota-onaning ezgu niyati bor edi. O‘sha yili Rajabboy bobo sportdagi mehnati va yutuqlari bilan el orasida nom qozonayotgan edi. Farzandi ham kelajakda yaxshi nom qoldiradigan, el-yurtga xizmat qiladigan inson bo‘lsin degan niyat bilan unga Shuhrat ismi berildi.
Rajabboy boboning hayotidagi eng katta natijalarni faqat uning shaxsiy yutuqlaridan izlash to‘g‘ri bo‘lmas edi. Uning asl g‘alabalari shogirdlari hayotida ko‘rindi.
Uning qo‘lida sport sirlarini o‘rgangan yoshlar orasidan musobaqalarda g‘olib bo‘lgan, yuqori natijalarga erishgan, yurt sharafini himoya qilgan sportchilar yetishib chiqdi. Har bir shogirdining muvaffaqiyati esa murabbiy uchun o‘z mehnatining natijasi edi.
Oilasi — umrining suyanchi
Rajabboy boboning hayot yo‘ldoshi Yulduz buvi ham uning mashaqqatli mehnatida doimo yonida bo‘ldi. 1973-yilda qurilgan oila yillar davomida mehr, hurmat va o‘zaro suyanchga tayangan holda mustahkamlandi.
Bugun uning oilasida to‘rt o‘g‘il, ikki qiz, 19 nafar nabira va ikki nafar chevara bor. Rajabboy bobo uchun oila ham, shogirdlar ham katta mas’uliyat edi. U o‘zidan keyin nafaqat farzandlar, balki yaxshi nom, yaxshi tarbiya va ezgu ishlar qoldirishga intildi.
Xotirada qolgan umr
Afsuski, hozir Rajabboy bobo oramizda yo‘q.
Uning ketishi oila a’zolari, yaqinlari va shogirdlari uchun og‘ir yo‘qotish bo‘ldi. Ammo ayrim insonlarning hayoti ularning vafoti bilan tugamaydi. Ular tarbiyalagan shogirdlarida, bergan saboqlarida, farzandlari va nabiralarida davom etadi.
“Chempion bolam” degan onalik duosi esa uning hayotida o‘ziga xos tarzda amalga oshdi — Rajabboy bobo chempion bo‘lishdan ko‘ra, chempionlar yetishtirgan ustoz bo‘lib qoldi.
Joylari jannatdan, ruhlari shod bo‘lsin.
Durdona RAJABOVA,
Termiz shahridagi 16-umumta’lim maktabi o‘quvchisi
