Sariosiyo tumanidagi og‘ir toifadagi “Sharafobod” mahallasida amalga oshirilgan bunyodkorlik va obodonlashtirish ishlari yakunlanib, hududning yangicha qiyofasi namoyish etildi. Mahallaning ochilish marosimida tuman hokimi Odiljon Yaqubov, deputatlar, mahalla yettiligi a’zolari, nuroniylar, faollar, yoshlar, quruvchilar va keng jamoatchilik vakillari ishtirok etdi.
Loyiha doirasida 1,6 kilometr ichki yo‘l asfaltlandi, 2 ta yangi transformator o‘rnatildi. Shuningdek, 130 ta elektr ustuni yangilanib, 5 kilometr SIP yopiq kabel tarmog‘i tortildi. Aholi uchun 1,3 kilometr piyodalar yo‘lagi barpo etilib, 1,2 kilometr ichki ariqlar betonlashtirildi. Amalga oshirilgan ishlar mahalla infratuzilmasini yaxshilash, aholiga qulay sharoit yaratish va hududni obod hamda ko‘rkam maskanga aylantirishga xizmat qilmoqda.
Mazkur bunyodkorliklar Mustaqilligimizning 35 yilligini munosib kutib olish yo‘lida hududlarda olib borilayotgan keng ko‘lamli ishlarning amaliy ifodasidir.
