Janubi-G‘arbiy maxsus harbiy okrug tasarrufidagi Termiz garnizonida joylashgan harbiy qism madaniyat markazida O‘zbekiston xalq yozuvchisi O‘tkir Hoshimov tavalludining 85 yilligi munosabati bilan “O‘tkir Hoshimovning o‘zbek milliy va zamonaviy adabiyotiga qo‘shgan hissasi” mavzusida adabiy-badiiy kecha tashkil etildi.
Unda so‘zga chiqqanlar adibning boy ijodiy merosi, uning asarlari orqali milliy qadriyatlar, insonparvarlik, mehr-oqibat va Vatanga muhabbat tuyg‘ularini targ‘ib etishdagi beqiyos o‘rni haqida fikr bildirdilar.
Tadbir davomida harbiy xizmatchilar O‘tkir Hoshimovning mashhur asarlaridan parchalar o‘qib, yozuvchi ijodida ilgari surilgan yuksak insoniy fazilatlarni tarannum etuvchi g‘oyalarni namoyon etdilar.
Mazkur adabiy-badiiy kechadan ko‘zlangan asosiy maqsad harbiy xizmatchilarning ma’naviy-ma’rifiy saviyasini yuksaltirish, kitobxonlik madaniyatini keng targ‘ib etish, milliy adabiyotga bo‘lgan qiziqishni oshirish hamda yoshlar qalbida vatanparvarlik, milliy g‘urur va ma’naviy barkamollik tuyg‘ularini yanada mustahkamlashdan iborat bo‘ldi.
Akbar Axmedov,
III darajali serjant
Termiz garnizoni
