Janubi-G‘arbiy maxsus harbiy okrug tasarrufidagi Termiz, Kakaydi va Xayrabod garnizonlarida joylashgan harbiy qismlarda harbiy xizmatchilar o‘rtasida kibersport musobaqasiga start berildi.
Kakaydi garnizonida o‘tkazilgan musobaqada ishtirokchilar strategik fikrlash, tezkor qaror qabul qilish, jamoaviy hamkorlik, axborot-kommunikatsiya texnologiyalaridan samarali foydalanish hamda murakkab vaziyatlarda to‘g‘ri taktik yechim topish borasidagi bilim va mahoratini namoyon etdilar.
Bellashuvlar harbiy xizmatchilarning intellektual salohiyatini yuksaltirish, axborot texnologiyalari sohasidagi amaliy ko‘nikmalarini mustahkamlash, sog‘lom raqobat muhitini shakllantirish va bo‘sh vaqtlarini mazmunli tashkil etishga xizmat qiladi.
Ayni bu kabi kibersport musobaqalari Janubi-G‘arbiy maxsus harbiy okrug tasarrufidagi boshqa garnizonlarda ham bosqichma-bosqich o‘tkazilmoqda. Ularni tashkil etishdan ko‘zlangan asosiy maqsad harbiy xizmatchilarning raqamli texnologiyalarga oid bilimlarini oshirish, strategik va tahliliy fikrlash qobiliyatini rivojlantirish hamda jamoada ishlash ko‘nikmalarini yanada takomillashtirishdan iborat.
Musobaqa yakuniga ko‘ra g‘olib va sovrindorlar qo‘mondonlikning Faxriy yorlig‘i hamda qimmatbaho sovg‘alari bilan taqdirlanadi.
Akbar Axmedov,
III darajali serjant
Termiz garnizoni
