Oʻzbekiston va Afgʻoniston oʻrtasidagi amaliy hamkorlik yana bir muhim loyiha bilan boyimoqda. Ikki davlatning qishloq xoʻjaligi sohasidagi sherikligini mustahkamlashga xizmat qiladigan “Oʻzbek–Afgʻon doʻstlik bogʻi” qurilishiga Afgʻonistonning Faryob viloyatida rasman start berildi.
Loyiha Oʻzbekiston hukumat delegatsiyasining Afgʻonistonga tashrifi doirasida boshlandi. Xon-Chorbogʻ tumanidagi 60 gektar maydonda barpo etilayotgan bogʻga 40 ming tup mevali koʻchat ekilib, zamonaviy tomchilatib sugʻorish tizimi joriy etiladi. Shuningdek, sugʻorishni uzluksiz taʼminlash maqsadida 8 ming kub metr sigʻimli suv ombori quriladi.
Mutasaddilar taʼkidlashicha, mazkur loyiha zamonaviy bogʻdorchilik texnologiyalarini keng joriy etish, meva yetishtirish hajmini oshirish hamda Oʻzbekiston va Afgʻoniston oʻrtasidagi doʻstlik va iqtisodiy hamkorlikni yanada mustahkamlashga xizmat qiladi.
