Ta’lim sifatini oshirish, baholash jarayonining shaffofligi va adolatliligini ta’minlash maqsadida O’zbekistonda oliy ta’lim muassasalarida talabalar bilimini baholashning yangi tartibini joriy etish rejalashtirilmoqda.
Vazirlar Mahkamasi qarori loyihasiga ko’ra, 2026–2027-o’quv yilidan boshlab bakalavriat va magistratura talabalarining bilimini baholash 100 ballik tizim asosida amalga oshiriladi. Unda joriy nazorat uchun 30 ball, oraliq nazorat uchun 20 ball, yakuniy nazorat uchun esa 50 ball ajratiladi.
Shuningdek, professor-o’qituvchilar har bir baholangan topshiriq bo’yicha talabaga qisqa izoh (fidbek) berishi belgilanmoqda. Yakuniy imtihonlar audio va videokuzatuv ostida o’tkazilib, ularni oliy ta’lim muassasalari rasmiy veb-saytlari orqali onlayn kuzatish imkoniyati yaratiladi.
Loyihada kompyuterda imtihon topshirish platformalarini ishlab chiqish, talabalar fikrini muntazam o’rganish hamda ko’rish imkoniyati cheklangan talabalar uchun qulay va moslashtirilgan imtihon shakllarini joriy etish ham nazarda tutilgan.
Mazkur o’zgarishlar oliy ta’limda shaffoflikni kuchaytirish, baholashning xolisligini ta’minlash va ta’lim sifatini yangi bosqichga olib chiqishda muhim ahamiyat kasb etadi.
