Aholini sifatli va zamonaviy tibbiy xizmatlar bilan qamrab olish, sog‘liqni saqlash infratuzilmasini rivojlantirish borasidagi ishlar izchil davom etmoqda. Bu yo‘nalishdagi navbatdagi muhim loyiha Qumqo‘rg‘on tumanida hayotga tatbiq etildi.
Tumanning “Yangi shahar” mahallasida yangi bunyod etilgan “Sifat Med” xususiy klinikasi tantanali ravishda foydalanishga topshirildi. Zamonaviy tibbiy uskunalar bilan jihozlangan muassasada 25 nafar malakali shifokor va o‘rta tibbiyot xodimi faoliyat yuritib, aholiga diagnostika hamda davolash xizmatlarini ko‘rsatadi.
3 milliard 500 million so‘m mablag‘ evaziga barpo etilgan ushbu klinika tuman aholisining zamonaviy tibbiy xizmatlardan foydalanish imkoniyatlarini kengaytirish, xizmat sifati va qulayligini yanada oshirishga xizmat qiladi.
