Davlat boshqaruvida shaffoflik va manfaatlar to‘qnashuvining oldini olish korrupsiyaga qarshi kurashning muhim yo‘nalishlaridan biridir. Shu maqsadda O‘zbekistonda sobiq davlat xizmatchilarini ishga qabul qilishda yangi nazorat tartibi joriy etildi.
Endilikda davlat organi yoki tashkilotida ishlagan shaxs ishdan bo‘shaganidan keyin ikki yil davomida o‘zi nazorat qilgan tashkilotga ishga qabul qilinishidan avval avvalgi ish joyining korrupsiyaga qarshi ichki nazorat bo‘linmasidan majburiy xulosa olinadi.
Ichki nazorat bo‘linmasi nomzod bo‘yicha ijobiy, cheklovli ijobiy yoki salbiy xulosa beradi. Xulosa olinmagan yoki salbiy baho berilgan hollarda nomzodni ishga qabul qilishga yo‘l qo‘yilmaydi. Shuningdek, xulosa yuzasidan norozi bo‘lgan fuqarolar yuqori turuvchi tashkilot yoki Korrupsiyaga qarshi kurashish agentligiga murojaat qilish huquqiga ega.
Mazkur tartib davlat xizmatida halollik, ochiqlik va xolislik tamoyillarini mustahkamlash, manfaatlar to‘qnashuvini bartaraf etish hamda korrupsiyaviy xavflarni kamaytirishga xizmat qiladi.
