Mamlakatimiz taraqqiyotining bugungi bosqichida yoshlar masalasi shunchaki ijtimoiy yo‘nalish
emas, balki davlat siyosatining ustuvor poydevoriga aylandi. Prezidentimiz tashabbusi bilan haftaning har payshanba kuni — “Yoshlar kuni” deb e’lon qilinishi yurtimizdagi barcha bo‘g‘indagi rahbarlar uchun o‘ziga xos sinov va imkoniyat maydoniga aylanayotir. Endilikda vazirliklar, idoralar va hokimliklar rahbarlari kabinetlardan chiqib, bevosita mahalla, maktab va texnikumlarga yo‘l olmoqdalar.
Bu jarayonning mohiyati shundaki, yoshlarning muammosi joyida o‘rganiladi, takliflari eshitiladi va eng muhimi — yechim uzoq kuttirmaydi.
Payshanba — bu shunchaki kalendar sanasi emas, balki yoshlarning dardi tinglanadigan, iqtidori rag‘batlantiriladigan va orzulari uchun yo‘l ochiladigan kundir.
Yoshlar bilan muloqot davomida belgilab berilgan ustuvor vazifalar
yoshlar hayotining barcha jabhalarini qamrab oldi:
Sifatli ta’lim va chet tillari: Jahon bozorida raqobatbardosh kadrlar tayyorlash;
Raqamli texnologiyalar: IT sohasini yoshlar hayotining ajralmas qismiga aylantirish;
Tadbirkorlikni qo‘llab-quvvatlash: Yoshlarning biznes g‘oyalari uchun moliyaviy “qanot” berish;
Sport va madaniyat: Iqtidorni namoyon etish uchun keng maydon yaratish.
Hurmatli Prezidentimiz ta’kidlaganlaridek, yoshlar — Yangi O‘zbekistonning haqiqiy bunyodkorlaridir. Bugun yaratilayotgan sharoitlar, bildirilayotgan yuksak ishonchga munosib javob berish endi navqiron avlodning o‘z qo‘lida. Biz yoshlarimizga ishonamiz, chunki ular — mustaqil fikrlaydigan, irodali va Vatani taqdiri uchun mas’uliyatni his qiladigan kuchdir.
Uchrashuv shunchaki muloqot bo‘lib qolmadi, u yangi marralar sari dadil qadam, millat kelajagi uchun tashlangan mustahkam poydevor bo‘ldi.
Dilbar NORMURODOVA,
Xalq deputatlari Termiz shahar Kengashi raisi
