Mamlakatimizda aholi va qishloq xo‘jaligini ro‘yxatga olish ishlarini yuqori saviyada tashkil etish maqsadida joylarda izchil chora-tadbirlar amalga oshirilmoqda. Shu munosabat bilan Jarqo‘rg‘on tumani hokimligida mazkur muhim jarayonga bag‘ishlangan o‘quv-seminar tashkil etildi.
Seminarda tuman hokimligi mutasaddilari, statistika organlari vakillari, mahalla faollari hamda sohada mas’ul xodimlar ishtirok etdi. Tadbir davomida aholi va qishloq xo‘jaligini ro‘yxatga olishning ahamiyati, uni o‘tkazish tartibi, xalqaro tajriba va qonunchilik asoslari batafsil tushuntirildi.
Ta’kidlanganidek, ro‘yxatga olish natijalari hududlarni ijtimoiy-iqtisodiy rivojlantirish, qishloq xo‘jaligi sohasini rejalashtirish, aholi ehtiyojlarini aniqlash hamda davlat dasturlarini ishlab chiqishda muhim ahamiyat kasb etadi. Shuningdek, jarayonda raqamli texnologiyalardan foydalanish, ma’lumotlarning aniqligi va shaffofligini ta’minlash masalalariga alohida e’tibor qaratildi.
Yakunda ishtirokchilarning savollariga mutaxassislar tomonidan atroflicha javoblar berildi hamda kelgusida amalga oshirilishi lozim bo‘lgan vazifalar belgilab olindi. Bunday tadbirlar aholi va qishloq xo‘jaligini ro‘yxatga olish jarayonlarini samarali tashkil etishga xizmat qilishi qayd etildi.
