Tashabbusli byudjetning 2025-yil 1-mavsumi doirasida Denov tumanidagi O‘zbekiston MFY hududida joylashgan 46-sonli umumiy o‘rta ta’lim maktabini ta’mirlash bo‘yicha belgilangan 1,5 milliard so‘mlik loyiha doirasidagi ishlar to‘liq yakunlandi. Loyihaning bosh pudratchisi — “Chinor” MCHJ tomonidan maktab hududida 1 dona sun’iy qoplamali stadion bunyod etildi hamda qolgan mablag‘ hisobidan maktabning ta’mirtalab binolarida zarur ta’mirlash ishlari amalga oshirildi.
Yangi sport maydonchasi foydalanishga topshirilishi munosabati bilan o‘tkazilgan ochilish marosimida Denov tumani hokimi vazifasini vaqtincha bajaruvchi Ilhom Safarov ishtirok etdi.
Shuningdek, Tashabbusli budjetning 2025-yil 2-mavsumi doirasida jami 14 ta mahallada 55,3 km ichki yo‘llarni asfaltlash rejalashtirilgan bo‘lib, 8-dekabr holatiga ko‘ra 8 ta mahallada 32,3 km ichki yo‘llar asfaltlanib, aholiga foydalanish uchun topshirildi.
Ushbu ishlar aholining qulay yashash sharoitlarini yaxshilash, hudud infratuzilmasini modernizatsiya qilish va tuman rivoji uchun xizmat qilmoqda.
