Iqtisodiy ko‘rsatkichlari nisbatan past bo‘lgan Termiz tumani qishloq xo‘jaligiga ixtisoslashgan hududdan sanoatlashgan va investitsiyaviy salohiyati yuqori tumanga aylanib borayotir. Bu borada amalga tatbiq etilayotgan loyihalarning ahamiyati katta boʻlmoqda.
Viloyat hokimi Ulug‘bek Qosimov Termiz tumanida bo‘lib, amalga oshirilayotgan ana shunday loyihalar ijrosi bilan yaqindan tanishdi. Jumladan, “Termiz” erkin iqtisodiy zonasida “Azizi Trade” MCHJ tomonidan yo‘lga qo‘yilgan un va un mahsulotlari ishlab chiqarish loyihasi ko‘zdan kechirildi. Mutasaddilar tomonidan erkin iqtisodiy zonadagi loyihalar holati bo‘yicha axborot berildi.
Tashrif doirasida shuningdek, “Janub elita naslchilik” MCHJda go‘sht va sut mahsulotlari ishlab chiqarish jarayoni, “O‘zneftgaz burg‘ilash ishlari” MCHJning Termiz 1-sonli qudug‘idagi burg‘ulash jarayonlari hamda O‘zbekiston–Tojikiston davlat chegarasida joylashgan chegara-bojxona posti faoliyati ham o‘rganildi.
Chegara-bojxona postida zargarlik va qimmatbaho toshlarning import-eksporti bo‘yicha amalga oshirilayotgan ishlar va kelgusidagi rejalar yuzasidan taqdimot o‘tkazildi.
