Surxondaryo viloyatida ilg‘or xorijiy tajribalar asosida umumta’lim maktablarida “Kasb markazlari” faoliyati yo‘lga qo‘yildi. Xususan, Termiz shahar politexnikumida tashkil etilgan “Kasb markazi”da o‘tkazilgan tadbirda Surxondaryo viloyati hokimi Ulug‘bek Qosimov ishtirok etib, yaratilgan shart-sharoitlar, kurs va to‘garaklar faoliyati bilan yaqindan tanishdi. Shuningdek, videokonferensaloqa orqali hududlardagi yana 15 ta markaz faoliyatiga rasman start berildi.
“Kasb markazlari”da hunarmandchilik, kulolchilik, yog‘och va metall o‘ymakorligi, sartaroshlik, robototexnika, oshpazlik va qandolatchilik, karving san’ati, tikuvchilik va kiyim dizayni kabi yo‘nalishlar bo‘yicha to‘garaklar tashkil etilgan. Shuningdek, ko‘ngillilar fotografiya, videotasvirga olish, grafik dizayn va gulchilik, duradgorlik, avtotrinajyor, kibersport va ot sportini ham o‘rganishlari mumkin. Shu bilan birga, SMM (Social Media Marketing) — Instagram, TikTok, Facebook kabi ijtimoiy tarmoqlarda kontent yaratish, reklama va targ‘ibot strategiyalari sirlari ham malakali mutaxassislar tomonidan o‘rgatilishi yo‘lga qo‘yilgan.
Viloyat hokimi to‘garaklar faoliyati bilan tanishib, mas’ullarning axborotlarini tingladi hamda o‘quvchi yoshlarning qiziqishlarini inobatga olgan holda to‘garaklar sonini yanada oshirish bo‘yicha tegishli vazifalarni belgilab berdi.
