Surxondaryo viloyati hokimi Ulug‘bek Qosimov viloyat hududlarida amalga oshirilayotgan yirik infratuzilmaviy va ijtimoiy loyihalar ijrosi, shuningdek, avvalgi tashriflarda berilgan topshiriqlarning bajarilish holatini o‘rgandi. Xususan, Termiz shahrining “Manguzar” mahalasida zamonaviy talablarga javob beradigan ixtisoslashtirilgan maktab-internat qurilishiga start berildi. “PREMIUM INSHAAT BUILDING” MCHJ tomonidan amalga oshirilayotgan mazkur loyiha doirasida 504 o‘rinli o‘quv bloki, 222 o‘rinli yotoqxona hamda 12×24 metr o‘lchamdagi sport zali barpo etiladi.
Shuningdek, “Yangi Termiz siti” majmuasi hududida ko‘p qavatli turar joylar, mehmonxona, yo‘l infratuzilmasi va kommunal tarmoqlar qurilishi bo‘yicha mas’ullarning axborotlari tinglandi.
Shundan so‘ng, Termiz tumanida joylashgan “Yangi O‘zbekiston” massivida bog‘, 3 500 o‘rinli amfiteatr, muzey, Termiz davlat pedagogika instituti uchun 1 500 o‘rinli o‘quv binosi, “Magic City” dam olish majmuasi va “Yoshlar sanoat zonasi” doirasidagi ishlab chiqarish obyektlari qurilishi bilan bog‘liq ishlar o‘rganildi.
