Hududlarda “Zarbdor” tajribasi asosida drayver loyihalar amalga oshirilmoqda. Shu doirada Termiz shahrining “Jo‘yjangal” mahallasidan o‘tuvchi kanal bo‘yida yangi saylgoh qurilishiga start berildi.
“Termiz Sanoat Qurilish Industriya” MCHJ tomonidan amalga oshirilayotgan loyiha savdo, xizmat ko‘rsatish va ko‘ngilochar maskanlarni o‘z ichiga oladi. Viloyat hokimi Ulug‘bek Qosimov saylgohda yashil maskanlar, veloyo‘laklar va sog‘lomlashtirish inshootlarini tashkil etish yuzasidan tavsiyalar berdi.
Shundan so‘ng, Termiz tumanidagi 12-sonli ayrim fanlar chuqurlashtirilib o‘qitiladigan maktabda namunaviy loyiha asosida tashkil etilgan va autsorsing orqali ishlovchi oshxona hamda oromgoh to‘garaklari faoliyati bilan tanishildi.
Shuningdek, shu yerning o‘zida maktablardagi bo‘sh bino va yer maydonlarida ijara asosida faoliyat yurituvchi kitob do‘konlari, o‘quv kurslari va sog‘lom ovqatlanish maskanlari tashkil etish loyihalari taqdimot qilindi. Ularni takomillashtirish yuzasidan ko‘rsatmalar berildi hamda bu loyihalar orqali maktablar o‘z ehtiyojlari uchun qo‘shimcha mablag‘larga ega bo‘lishi qayd etildi.
