Ish, oilaviy tashvishlar bilan inson ma’naviy xordiq chiqarishni unutib qo‘yadi. Mablag‘ topilsa-da, vaqt masalasi sabab sayohat, ko‘ngilochar tadbirlar-u ma’naviy xordiqni keyingi suramiz. Natijada, ma’naviy dunyomiz o‘tmaslashib borayotganga o‘xshaydi. Biz kinoga, teatrga bora olmayotgan bir paytda, kinoning o‘zi bizni izlab kelsa, bunday holatda hech qanday bahonaga o‘rin qolmaydi.
Angor tumanidagi Ulug‘bek mahallasida joylashgan Yangiobod madaniyat markazida “Kinokarvon” loyihasi tashkil etildi. Tadbirda bugungi kunda yoshlar tomonidan teledasturlar va ijtimoiy tarmoqlardan ma’naviyatimizga oid milliy kino va teatrlarni kuzatib borish tavsiya etildi.
Loyiha davomida O‘zbekiston Respublikasi Kinematografiya agentligi hamda Rossiya Federatsiyasi Madaniyat vazirligi hamkorligida suratga olingan “Quyosh ta’mi” nomli badiiy filmi namoyish etildi. Tomoshabinlar zavq ila, maroq ila film tomoshasiga berildilar.
