Gʻalaba ishonch bagʻishlaydi

G‘oyalar, loyihalar amaliyotga tadbiq etilar ekan, ilmda, fanda, texnologiyada o‘zgarishlar, yangilanishlar kuzatiladi. Ayniqsa, bunday yangilanishlarning muallifi yosh avlod ekan, ertangi kunimiz ishonchli qo‘llarda ekaniga amin bo‘lamiz. Ana shunday iqtidorli, tashabbuskor yoshlarni qo‘llab-quvvatlash maqsadida esa “Mirzo Ulug‘bek vorislari” ko‘rik-tanlovi tashkil etilgan.
Tanlovning hududiy bosqichlaridan muvaffaqiyatli o‘tgan yoshlar respublika bosqichida ham hakamlar hay’ati e’tiboriga loyihalari taqdimotini qildilar. Toʻrt kun davom etgan “Mirzo Ulugʻbek vorislari” tanlovining finalida respublikaning turli hududlaridan tashrif buyurgan 280 nafar iqtidorli yosh turli yoʻnalishlar boʻyicha oʻz gʻoya va loyihalari bilan ishtirok etdi.
Quvonarlisi, mazkur tanlovda Xadicha Faxriddinova, Farzona Usmonova, Kayhon Atoyev, Nurali Murodullayev kabi Termiz davlat universitetining iqtidorli talabalari gʻolib va sovrindorlar qatoridan joy olishdi. Bu bilan ular maxsus sertifikat hamda 6 800 000 so‘m pul mukofoti bilan taqdirlanishdi, shuningdek, Italiyaning Toshkent shahridagi Turin politexnika universitetida imtihonsiz o‘qish imkoniyatini ham qo‘lga kiritishdi.