Qushlar rasmini chizishdi

Qushlarning chug‘uri quloqqa hush yoqadi. Ularning u yoqdan-bu yoqqa uchayotganini kuzatib-da zavq olamiz. Hatto, ba’zi qush turlarini xonadonimizda parvarish qilishga-da odatlanganmiz. Qushlar do‘stimiz, ular orasida afsuski, yo‘q bo‘lib ketayotgan noyob turlari ham borki, ularni asrab-avaylash lozim.
Termiz Hayvonot bog‘ida maktab o‘quvchilari ishtirokida 1-aprel — Xalqaro qushlar kuni munosabati bilan tadbirlar o‘tkazildi. Har bir ishtirokchi o‘z suratida hayvonot bog‘ida saqlanayotgan noyob qushlarni aks ettirishga harakat qildi. Tadbir davomida yosh rassomlar bor iqtidor va mahoratlarini ishga solishlariga to‘g‘ri keldi. Eng chiroyli chizilgan surat sohiblariga faxriy yorliq hamda esdalik sovg‘alari berildi.