Yoshlar gulxan atrofida jam

Albatta, qaysidir rahbarning qabuliga kirsangiz, aytadigan gapingiz-da yodingizdan ko‘tarilishi, rahbarning susti bosishi aniq. Qachonki, dilkash davralarda samimiy suhbat qursangiz, aytar gapingiz bo‘ladi. O‘z g‘oya va loyihalaringizni emin-erkin ayta olasiz. Angor tumanida gulxan atrofida yoshlar bilan bo‘lib o‘tgan uchrashuvda ham xuddi shunday bo‘ldi.
Uchrashuvda tuman hokimi Qosim Mardonov va sektor rahbarlari ishtirok etdi. Tuman rahbari yosh avlod vakillari bilan suhbatlashib, ularga bilim olishlari, kasb-hunar egallashlari borasida o‘zining tavsiya va takliflarini berdi. Shundan soʻng, yoshlar oʻz iqtidorlarini namoyish etishdi. Kuy va qo‘shiqlar, she’rlar davrаga o‘zgacha shukuh bag‘ishladi.
Gulxan atrofida yoshlarni birlashtirgan bu oqshom barchada katta taassurot qoldirdi.