Surxondaryo viloyatida “Yuksalish” harakati Surxondaryo viloyati hududiy bo‘linmasi tomonidan “O‘zbekiston–2030” strategiyasini “Yoshlar va biznesni qo‘llab-quvvatlash yili”da amalga oshirishga oid davlat dasturi to‘g‘risidagi O‘zbekiston Respublikasi Prezidenti Farmoni loyihasini mazmun-mohiyatini tushuntirishga bag‘ishlangan jamoatchilik muhokamalari tashkil etilmoqda. Xususan, Termiz davlat universiteti yoshlari ishtirokida hamda respublika shoshilinch tibbiy yordam ilmiy markazida tashkil etilgan muloqot davomida dasturning ahamiyati va yoshlarning dasturga berayotgan takliflari muhim ekanligi ta’kidlandi.
Tadbirda so‘zga chiqqan yosh borki, o‘zining taklif va murojaatlarini yo‘lladi. Kimdir oliy ta’limda tahsil olayotgan talabalarni hafta yoki darslar davomida tadbirkorlik ko‘nikmalarni berib borish bo‘yicha taklif bildirgan bo‘lsa, yana bir talaba chekka hududlardagi qishloqlarda zamonaviy sport zallarini qurish va sport maydonchalarni barpo etish haqida to‘xtaldi. Shuningdek, Surxondaryo viloyatida yirik ishlab chiqarish korxonalarining soni sanoqli ekanligi, oliygohni muhandislik yo‘nalishi bo‘yicha tamomlayotgan talabalar ish topa olmayotganligi, bugungi kunda bitiruvchilarini ish bilan ta’minlash bo‘yicha korxona va tashkilotlar bilan tizimli ishlarni olib borishi to‘g‘risida takliflar berildi.
Muhokamalar joriy yilning 31-yanvaridan 14-fevraliga qadar davom etadi va takliflar olinadi. Davlat dasturi loyihasi bo‘yicha olingan takliflar jamoatchilik.uz, uzbekistan2030.uz platformalariga joylashtirilmoqda.
