O‘quvchilar uchun bepul avtobus

Film va seriallarda maktabga boruvchi o‘g‘il-qizlarni shundoqqina ko‘chasiga maktab avtobusi kelib olib ketadi. Yoshlar ham, ularning ota-onalari ham farzandining maktabga qanday borib kelayotganini o‘ylashmaydi. Maktabdan qaytishda ham holat takrorlanadi. Bu xavfsiz va qulay usul. Tomoshabin esa havasla tomoshaga beriladi. Qaniydi, bir necha kilometr masofa bosib, maktab boradigan bolalar uchun ham yurtimizda ana shunday avtobuslar qatnovi yo‘lga qo‘yilsa-yu, muammo munosib yechim topsa, degan shirin xayolda bo‘lgan ota-onalar va yoshlarning niyatlari amalga oshadigan bo‘ldi.
2024-yilning 1-sentabrdan boshlab, Surxondaryo va Qashqadaryo viloyatlarida tajriba-sinov tariqasida umumiy o‘rta ta’lim maktablariga olis hududlardan qatnaydigan o‘quvchilar uchun autsorsing asosida bepul avtobuslar qatnovini yo‘lga qo‘yiladi. Ushbu loyiha «O‘zbekiston – 2030» strategiyasini «Yoshlar va biznesni qo‘llab-quvvatlash yili»da amalga oshirishga oid davlat dasturi to‘g‘risida»gi Prezident Farmoni loyihasida belgilab qo‘yildi.