Asl xazina nima? Bu savolga har kimning javobi turlicha. Ammo, Surxondaryo viloyati Musiqali drama teatri jamoasi Angor tumanida ijodiy safar chog‘ida tomoshabinlar hukmiga havola etgan “Asl xazina” spektakli orqali ushbu savolga o‘z talqinlarida javob qaytarishdi.
Shukrullo Mahkamov qalamiga mansub ushbu spektakl komedik janrda boʻlsa-da, unda koʻtarilgan muammolar ogʻriqli va davr talabidan kelib chiqqan. Asar mazmuniga to‘xtaladigan bo‘lsak, bosh qahramon Esonboy otasidan qolgan devor orasidan quticha topib oladi. Esonboyning atrofidagi boshqa qahramonlar, ya’ni xotini Erkinoy, qoʻshnisi, profilaktika noziri, va usta yigit Teshavoylar qutichada xazina bor deb oʻylaydi.
Shu tariqa ular bir-biridan bekitib, qutichani ochib koʻrishadi va uning ichidagi yozuvlarni oʻqigach, biri esidan ogʻib, boshqasi eshitmay, yana birining koʻziga hech kim koʻrinmay qoladi.
Asar qahramonlari aslida insoniyatning eng katta boyligi boʻlmish — eshitish, koʻrish va tafakkur qilish kabi ne’matlarning qadriga yetmasdan, keyinchalik ulardan ajrab qolganida esa sogʻlik eng katta xazina ekanligini anglab yetishadi.
