Kimdir imkonsizligidan imkon yo‘nish uchun qabullarga qatnayverib, bir nimalik bo‘lish payida yuradi. Kimlardir esa buni o‘ziga or deb bilib, eng to‘g‘ri yo‘l va yechim sabr bilan mehnat qilish deb biladi. To‘g‘ri-da, mehnat, o‘zidagi imkoniyatlardan oqilona foydalana bilishlik eng oqil qaror aslida. Angorlik Muqaddas Qo‘ziboyeva ham turmush o‘rtog‘ining vafotidan so‘ng, taqdir sinovlarini yengib o‘tish, uch nafar farzandini tarbiyalash, birovdan kam qilmaslik uchun mehnat bilan do‘st tutindi.
Qiyinchiliklar oldida bosh egmay, ularni sabr-bardosh bilan yengib o‘tdi. Shaxsiy tomorqasidan daromad topib, farzandarini o‘qitdi, uyli-joyli qildi. Tumandagi “Bahor” mahallasida yashab kelayotgan Gulhol Ravshanova ham Muqaddas Qo‘ziboyevadan aslo qolishmaydi. Opaning bosib o‘tgan hayot yo‘li ko‘pchilikka o‘rnak bo‘lsa arziydi. Yer bilan tillashib, dehqonchilik qilib kelayotgan Gulhol opa mehnati ortidan daromad topib, hayot qiyinchiliklarini yengib o‘tmoqda.
