Maktablar berayotgan ta’lim-tarbiya o‘quvchilarining oliy ta’lim muassasalariga o‘qishga kirish-kirmasligiga qarab belgilanayotir. To‘g‘ri-da, bunday ko‘rsatkich maktabga, qolaversa, o‘qituvchilar jamoasiga munosib baho bera oladi. Bu esa o‘z navbatida o‘qituvchilar oldidagi mas’uliyatni kuchaytiradi. Davlatning ham, xalqning bu borada maqsadi bitta — yoshlar munosib ta’lim-tarbiya olib, oliygoh talabasi bo‘lishi lozim.
Shu maqsadda 2022-2023-o‘quv yilida oliy ta’lim muassasalariga kirishda past ko‘rsatkichlarni qayd etgan maktablarga metodik yordam ko‘rsatish maqsadida viloyat Maktabgacha va maktab ta’limi boshqarmasi tomonidan tajribali maktab rahbarlari va o‘rinbosarlari, shuningdek, malakali pedagoglardan tarkib topgan mobil metodik guruhlar tashkil etildi.
Ayni kunlarda mazkur guruhlar o‘tgan o‘quv yilida ko‘rsatkichlari past bo‘lgan maktablarda bo‘lib, metodik yordam ishlarini amalga oshirishmoqda. Bundan ko‘zlangan asosiy maqsad ta’lim-tarbiya jarayonlari sifatini yuqori darajaga olib chiqish va bitiruvchilarning oliy ta’lim muassasalariga kirishida yaxshi natijalarga erishishni ta’minlashdir.
