Mehnatiga yarasha…

Olma mevasini kunlik ratsionimizga kiritishga odatlanib qolganmiz. Hazm jarayonini tezlashtiradigan ushbu ne’mat mazali va shifobaxshligi uchun doimo dasturxonimizda. Olma shundoqqina daraxtda o‘sib, bizgacha yetib kelmaydi. Buning uchun bog‘bonning qarovi, e’tibor va g‘amxo‘rligi muhim. Qolaversa, tabiiy muhit, shart-sharoit ham ushbu mevaning mazasiga ta’sir ko‘rsatadi. Sho‘rchilik Abdumajid Xolyorov ham tomorqasida bog‘ tashkil qilib, olma ko‘chatini pavarish qilishni yo‘lga qo‘ygan.
— Tomorqamizning 14 sotix yer maydonida 98 tup olmazorimiz bor. Asosan “Saltanat” va “Fuji” navini ekkanmiz. Bu bog‘ni 2014-yilda tashkil qilganmiz. Bog‘da sifatli va mo‘l hosil olishi maqsadida, barcha agrotexnika qoidalariga amal qilamiz. O‘zi olma daraxti turli xil tuproq sharoitida o‘sa olishiga qaramay ular yaxshi va sifatli meva berish uchun unumdor tuproqda yaxshi rivojlanadi, – deydi Abdumajid Xolyorov.
Ana shunday tadbirli insonlarning mehnati, harakatlari boshqalar uchun eng yaxshi ibratdir aslida.