Surxondaryoda “Kitobxonlik festivali”

Bugun bolaning qo‘liga kitob berib, mutolaaga qiziqtirib bo‘lmaydi. Balki kattalarning o‘zi ibrat bo‘lishi lozim. Ana shundagina ko‘zlangan maqsadga erishish mumkin. Surxondaryo viloyat Barkamol avlod bolalar maktabida tashkil etilgan “Eng kitobxon oila” ko‘rik-tanlovining viloyat bosqichida farzandlariga o‘zlarining kitobxonligi bilan ibrat va namuna bo‘lgan oilalar ishtirok etdi.
Aytish kerakki, badiiy adabiyotlardan tuzilgan savollar, ularga berilgan javoblar, fikr-mulohazalarni tinglash har bir tomoshabinga o‘sha asarni o‘qishga qiziqish uyg‘otgan bo‘lsa, ajab emas. Sababi, ishtirokchilar asarlarni tahlil qilib berishar ekan, o‘zlarining his-hayajonga to‘la taassurotlarini ham yashirmadilar. Asosiysi bildirilgan fikrlar chuqur o‘ylab, mushohada qilinganligi bilan qimmatli bo‘ldi.
Tanlovda Termiz tumanidan ishtirok etgan Alimovlar oilasi 3-, sariosiyolik Xolnazarovlar oilasi 2-o‘ringa munosib ko‘rildi. Muzrabotlik Shomurodovlar oilasi esa eng ko‘p asarlar o‘qigani, mazmunli fikrlari, boy dunyoqarashi bilan 1-o‘rinni qo‘lga kiritishdi va tanlovning keyingi bosqichiga ishtirok etish uchun yo‘llanmani qo‘lga kiritishdi.
G‘oliblar “Kitobxonlik festivali”da taqdirlanadi.