Nogironligi bo‘lgan keksalar yoki yakka yolg‘iz nuroniylarni biror dard qiynasa, ularning kerakli tibbiy ko‘rik va muolajaa uchun borishlari haqiqiy muammoga aylanadi. Shu sabab bo‘lib, to‘shakka mixlanib qolishlari ham hech gap emas. Mana shunday paytlarda esa respublikamizning barcha hududlarida “Keksalar salomatligini muhofaza qilish oyligi”ning o‘tkazilishi eng yaxshi chora-tadbir bo‘lishi mumkin.
Sog‘liqni saqlash vazirligining 2023-yil 1-avgustdagi 10-175/qq-sonli va O‘zbekiston faxriylarining ijtimoiy faollini qo‘llab-quvvatlash “Nuroniy” jamg‘armasi Respublika boshqaruvining 2023-yil 1-avgustdagi 2-q/q-sonli qo‘shma qarorlarini ijrosini ta’minlash maqsadida, 1-avgustdan 1-sentyabrga qadar “Keksalar salomatligini muhofaza qilish oyligi” etib belgilandi.
Shu munosabat bilan Sariosiyo tumani hududidagi mahallalarda istiqomat qiluvchi nogironligi bo‘lgan keksalar, yakka yolg‘iz, front orti mehnat faxriylari va yotib qolgan keksa nuroniylarni tibbiyot mutaxassislari uyma-uy yurib, tibbiy ko‘rikdan o‘tkazdilar. Mutaxassislar tamonidan kerakli muolajaalar ko‘rsatilib, kerakli dori-darmon vositalari berildi.
Hilol
