“Agroplatforma” axborot tizimi joriy etiladi

Barcha sohalarda bo‘lgani kabi qishloq xo‘jaligi sohasida ham raqamli texnologiyalardan joydalanish keng ommalashib bormoqda. Bunda qabul qilingan “Qishloq xo‘jaligi sohasiga ilg‘or raqamli texnologiyalarni joriy qilish chora-tadbirlari to‘g‘risida”gi Prezident qarori (PQ–257-son, 02.08.2023 y.) dasturilamal bo‘lib xizmat qilmoqda. Qarorga ko‘ra, 2023-yil 1-sentyabrdan «Raqamli qishloq xo‘jaligi» yagona integratsion platformasi tarkibida “Agroplatforma” axborot tizimi joriy etiladi.
Ushbu platforma paxta, boshoqli don, meva-sabzavotlar yetishtirish uchun imtiyozli kredit ajratish jarayonlarini raqamlashtirish hamda qishloq xo‘jaligi mahsulotlari yetishtiruvchilarga shaffoflik tamoyili asosida xizmat ko‘rsatishni nazarda tutadi.
2024-yil hosilidan boshlab qishloq xo‘jaligi mahsulotlarini yetishtirish xarajatlari tijorat banklarining «Agroplatforma» AT orqali elektron tarzda shakllantirilgan buyurtmanomalari asosida moliyalashtiriladi. Bunda mahsulot etishtiruvchilarga «Agroplatforma» ATdagi shaxsiy kabinetlari orqali elektron xizmatlar ko‘rsatish yo‘lga qo‘yiladi.
Qarorga ko‘ra, 2024-yil 1-fevralgacha sohadagi statistik ma’lumotlarning ishonchliligi va tezkorligini ta’minlash uchun Agrar va oziq-ovqat sohasida vaziyatlarni baholash markazining ishga tushirilishi nazarda tutilgan. 2023-yil 1-oktyabrgacha «Agroplatforma» ATda qishloq xo‘jaligi yerlaridan foydalanuvchilarning yagona ma’lumotlar bazasi shakllantiriladi.