Madaniy meros obyektlarini boricha saqlay bilish ham san’at aslida. O‘tmishning zalvorini bor bo‘yicha avlodlarga yetkazishda ana shunday obyektlarning ko‘rinishiga gard ham yuqtirilmasligining harakati qilinadi. Bu albatta, har bir avlodning oldidagi burchdir.
Davlatimiz rahbarining Surxondaryoga tashrifi chog‘ida viloyatimiz hududidagi 10 ta madaniy meros yodgorliklarida arxeologik tadqiqotlar o‘tkazish belgilab berilgan bo‘lib, ayni kunlarda ushbu topshiriqlarning amaliy ijrosi qizg‘in tus olgan. Ya’ni, ushbu obyektlarning 3 tasida o‘rganish ishlari olib borilmoqda. Ekspeditsiya a’zolari bo‘lmish xitoylik arxeologlar tomonidan tumanda e’tiborga loyiq ishlar amalga oshirimoqdaki, bildirilgan taklif va g‘oyalar o‘rinli.
Surxondaryo viloyati hokimi Ulug‘bek Qosimov Boysun tumanida bo‘lib, ushbu “Rabot” arxeologik yodgorligi hududida olib borilayotgan tadqiqot ishlari bilan tanishdi. Ekspedisiya a’zolari bilan muloqot qildi. Muloqot davomida xitoylik arxeologlar tumanda arxeologiya muzeyi tashkil etish va dunyo tamaddun beshiklaridan biri bo‘lgan Boysunda topilgan eksponatlarni joylashtirish taklifini bildirdi.
Aytish joizki, “Rabot” arxeologik yodgorligi hududida olib borilgan tadqiqot ishlari davomida ikki ming yillik tarixga ega “yueji” davriga mansub erkak va ayol suyak qoldiqlari, turli sopol buyumlar, metal va tosh taqinchoqlar, temir pichoqlar topilgan bo‘lib, hozirda O‘zbek-Xitoy qo‘shma arxeologik tadqiqotlari davom ettirilmoqda.
S.Murodova
