Yurtimizda ijtimoiy himoya masalasiga katta e’tibor qaratilgan. Buning negizida xalqimizning ijtimoiy himoyaga muhtoj vakillarini qo‘llab-quvvatlash, yolg‘iz emasligini anglatish g‘oyasi mujassam. Shu sababdan ham uysizlarga uy-joy qurib berilayotir. Kerakli tibbiy yordam masalalari deymizmi, ish bilan ta’minlanish, imtiyozli kredit va subsidiyami, xullas barcha jabhada yengilliklar yaratib berilayotir.
Qiziriq tuman hokimi Sh.Rajabov va tuman davlat soliq inspeksiyasi boshlig‘i I.Abdullayev tashabbusi bilan esa yana bir ezgu ishga qo‘l urildi. “Ayollar daftari” hamda “Temir daftar”da ro‘yxatda turuvchi, boquvchisini yo‘qotgan 11 ta oila farzandlariga sunnat to‘yi qilib berildi. to‘y bolalarning yaqinlari, oila a’zolari samimiy yozilgan dasturxon atrofida jam bo‘lishib, dildan yayradilar. San’atkorlar tomonidan yangragan sho‘x-shodon kuy-qo‘shiqlarga raqsga tushdilar.
Tuman hokimi to‘ybolalarni tabriklab, esdalik sovg‘alarini topshirdi.
Hilol
