Muzrabot tumanidagi “Muzrabot darvoza” mahallasida noma’lum turdagi qushni uchratishdi. To‘g‘ri-da, latofatli uzunoyoqning bizning o‘lkalarga tashrifi har kimning ham e’tiborini tortishi aniq. Mahalliy aholi zudlik bilan Ekologiya va atrof-muhitni muhofaza qilish bo‘limiga xabar berishdi.
Murojaatga asosan ushbu qush tuman Ekologiya va atrof-muhitni muhofaza qilish bo‘limi va Milliy gvardiya xodimlari tomonidan holat o‘rganildi. Uzunoyoq qush kulrang turna ekani aniqlanib, vaqtinchalik saqlash uchun Termiz hayvonot bog‘iga topshirildi.
Aytish kerakki, kulrang turna – Yevropada hayot kechiruvchi yirik qush bo‘lib, miqdoriga ko‘ra turnalar orasida uchinchi o‘rinda turadi. Balandligi 115 santimetr, qanotlarining yoyilgandagi holati esa 180-200 santimetrni tashkil etadi. Vazni esa 6 kilogramgacha yetishi qayd etilgan.
S.Murodova
