Har bir sohani rivojlantirish negizida xalq manfaati yotadi. Birgina tibbiyot sohasini oladigan bo‘lsak, bemorlar sog‘ligini tiklash uchun chekka bir hududdan shaharga, poytaxtga, yoinki chet elga borishiga to‘g‘ri keladi. Bu o‘z navbatida ma’lum bir mablag‘ talab etadi.
Oltinsoy tumanida ijtimoiy muhofazaga muhtoj, viloyat markaziga borib davolanishga qurbi yetmayotgan bemorlarning uzog‘ini yaqin qiluvchi amaliyot yo‘lga qo‘yildi. Endilikda Termiz shahridagi viloyat shifoxonalarida ishlayotgan tajribali vrachlar Oltinsoyga kelib, murakkab muolajalarni o‘tkazib, tumandagi hamkasblariga yaqindan ko‘maklashmoqda.
Oltinsoy tuman markaziy shifoxonasining Shoshilinch tibbiy yordam bo‘limida ana shunday imkoniyati yetmagan 3 nafar bemorda viloyatdan kelgan malakali shifokor, Termiz shahridagi ko‘p tarmoqli 1-sonli kasalxonasining xirurg vrachi Bahodir Ahadov oltinsoylik shifokorlar bilan birga jarrohlik amaliyotini muvaffaqiyatli o‘tkazdi. Bir so‘z bilan aytganda ularni darddan forig‘ etdi.
S.Normurodova
