Sportchi raqibining qarshisida ko’rinish berdimi u o’z ori, Vatan sharafi va shoni uchun kurashadi. G’alaba ham yolg’iz o’ziniki emas, xalqniki, davlatniki ham. O’z o’rnida yutuqlar, qilingan mehnat va mashaqqat ham e’tirofsiz, e’tiborsiz qolmaydi. O‘zbekiston boks federatsiyasining Surxondaryo viloyati bo‘limi ortda qolgan musobaqalar yakuniga ko‘ra, xalqaro musobaqalarda O‘zbekiston sharafini muvaffaqiyatli himoya qilgan bokschilarni taqdirladi. Taqdirlash jarayonida O‘zbekiston boks federatsiyasi Surxondaryo viloyati bo‘limi rahbari Xayitali Allamurodov, sportchilar, ularning yaqinlari va boshqalar ishtirok etishdi.
Toshkent shahridagi U-22 Osiyo chempionatida oltin medalni qo‘lga kiritgan Dilshod Abdumurodov, bronza medali sohibasi Dilfuza Bekova, 2021-yilgi o‘smirlar o‘rtasidagi Osiyo chempionatida bronza, MDH o‘yinlarida kumush medalga sazovor bo‘lgan Muxlisa Toxirova, shuningdek yoshlar o‘rtasidagi Osiyo chempionatida kumush medalga ega chiqqan Diyorbek O‘rolov kabi bokschilarga pul mukofoti topshirildi.
S.Normurodova
