Har bir hududda sohalar bo‘yicha vazifalar berildimi, ijrosi bilan qiziqish mas’ullar mas’uliyatini oshirishga xizmat qiladi. Aks holda muammolar, kamchiliklar yuzaga chiqib, aholi uchun ko‘plab noqulayliklar tug‘ilishi aniq. Shu maqsadda viloyat hokimi Ulug‘bek Qosimov Qumqo‘rg‘on va Sho‘rchi tumanlariga tashrif buyurib, belgilangan vazifalar ijrosini o‘rgandi hamda joylardagi dolzarb muammolarni mahalliy aholi va mas’ullar ishtirokida tahlil qildi.
Xususan, Qumqo‘rg‘on tumanidagi “Yangi shahar” mahallasining Turkiston ko‘chasida ichimlik suvi tarmoqlarini tortish, yo‘l va piyodalar yo‘laklarini ta’mirlash, shuningdek, aholi turmush sharoitlarini yaxshilashga qaratilgan ishlar ko‘zdan kechirildi. Ijtimoiy himoyaga muhtoj oilalar holati o‘rganilib, mavjud muammolarni hal etishda mutasaddi tashkilotlar faolligi yetarli emasligi ta’kidlandi.
Mas’ul rahbarlarga bir hafta mobaynida ushbu mahallada doimiy ish olib borish, infratuzilmaviy muammolarni tez va sifatli hal etish bo‘yicha aniq vazifalar yuklatildi.
Shuningdek, Sho‘rchi tumanidagi “Obodon” mahallasida ham infratuzilmani yaxshilash, ijtimoiy soha obyektlarini ta’mirlash va aholi uchun qulay turmush muhitini yaratish masalalari o‘rganildi. Aniqlangan kamchiliklar va muammolarni bartaraf etish yuzasidan mutasaddilarga tegishli topshiriqlar berildi.
